Янги “Болажон” телеканалида хорижий фильмлар ўзбек субтитрлари билан намойиш этилади

oWJk2r13699979341701_b

2013 йилнинг 30 май куни Ўзбекистон Республикаси Президенти И. Каримов «Ўзбекистон миллий телерадиокомпанияси «Ёшлар» телерадиоканали» ёпиқ акстиядорлик жамияти қошида болаларга мўлжалланган янги рақамли «Болажон» телеканалини ташкил этиш тўғрисида»ги Қарорни имзолади. 2013 йил 1 июндан эфирга чиқа бошлайдиган «Болажон» телеканали Халқаро болаларни ҳимоя қилиш кунига мамлакатимиз болалари учун муносиб совға бўлди, деб хабар беради Ўзбекистон миллий телерадиокомпанияси расмий сайти.

«Болажон» янги телеканали дастурлари республикамизга амалдаги рақамли теледастурлар ижтимоий пакети таркибида тарқатилади.

3 ёшдан 10 ёшгача бўлган болаларга мўлжалланган «Болажон» янги рақамли телеканалининг асосий вазифалари ва фаолият йўналишлари қуйидагилар белгиланди:

болаларда атроф оламни идрок этиш, уларда миллий қаҳрамонлар, ўзбек халқи ва бошқа халқларнинг достонлари, эпослари, эртаклари персонажлари мисолида эзгулик ва адолат тушунчаларини шакллантириш ҳамда қарор топтиришга йўналтирилган билим берувчи ва ақлан ривожлантирувчи телевизион дастурлар тайёрлаб намойиш этиш;

болаларнинг қизиқувчанлигини, ақлий ва ижодий фаоллигини ривожлантириш, кўнгилочар-ўргатувчи телевизион кўрсатувлар, мактабгача ёшдаги ва кичик мактаб ёшидаги болалар учун мўлжалланган интеллектуал ўйинлар ва викториналар намойиш этиш орқали уларда ақлий ҳамда жисмоний меҳнатнинг бошланғич кўникмалари ва маданиятини шакллантириш;

жажжи телетомошабинларнинг ёш хусусиятларини ҳисобга олган ҳолда замонавий интерактив шакл ва усулларидан, рақамли ва мултимедияли технологиялар имкониятларидан фойдаланиб болаларнинг атроф оламни билиш, ундаги қизиқарли ва янги нарсаларни кашф этишга бўлган интилишларини қўллаб-қувватлаш;

болаларнинг хорижий тилларни ўрганишга бўлган қизиқишларини ривожлантиришга қаратилган махсус ўқув телекўрсатувлари тайёрлаш ҳамда болаларга мўлжалланган бадиий, мултипликацион ва маърифий филмларни хорижий тилларда, ўзбек тилидаги субтитрлар билан намойиш этиш;

болаларда табиатни ўрганишга бўлган қизиқишни ошириш, она-табиатга меҳр-муҳаббат ва атроф-муҳитга эҳтиёткорона муносабатни шакллантириш, уй ҳайвонларини, паррандаларни, аквариум жонзотларини, шунингдек хона ўсимликларини тўгъри парваришлашга ўргатиш;

болаларга жисмоний тарбия асосларини сингдириш, уларни спортга қизиқтириш, болалар ўртасида мусобақа руҳини кучайтириш, уларга ўз саломатликларини асрашни ҳамда санитария-гигиена қоидаларини ўргатиш.

Ўзбекистон миллий телерадиокомапанияси жамоаси халқимиз учун юқори бадиий савияга эга бўлган телерадиомаҳсулотлар етказиб бериш борасидаги фаолиятини замон талаблари асосида ҳамиша такомиллаштириб бораверади.