Андижонда Варшава менежмент университетининг филиали очилди

Ҳукумат 14 апрельдаги 211-сон қарори  билан “Collegium Humanum” Варшава менежмент университетининг Андижон филиали ташкил этилди. 

Филиал нодавлат олий таълим ташкилоти ҳисобланиб, унда ўқитиш “Collegium Humanum” Варшава менежмент университети (Польша Республикаси) (Муассис) томонидан тасдиқланадиган ўқув режалари ва фан дастурларига мувофиқ кундузги таълим шаклида, инглиз, рус ва ўзбек тилларида тўлов-контракт асосида амалга оширилади.

Ўқишнинг дастлабки босқичида қуйидаги бакалавриат таълим йўналишлари бўйича талабалар қабул қилинади:

● “Молия ва бухгалтерия ҳисоби”;

● “Транспорт ва логистикада менежмент”;

● “Халқаро бизнес ва маркетинг”;

● “Туризм, меҳмонхона иши ва умумий овқатланишда менежмент ва маркетинг”;

● “Кичик ва ўрта бизнесни бошқариш”;

● “Ахборот-коммуникация технологиялари”.

Мазкур олийгоҳда таълим 2021/2022 ўқув йилидан бошланиб, тўлов-контракт маблағлари миқдори Муассис томонидан белгиланади.

Битирувчиларга Ўзбекистонда олий таълим тўғрисидаги ҳужжат сифатида тан олинадиган диплом берилади.

Филиалнинг ҳар йилги қабул параметрларининг 10 фоизидан кам бўлмаган қисми ижтимоий ҳимояга муҳтож оилаларнинг қобилиятли фарзандлари орасидан танлов асосида абитуриентларни (Филиал гранти асосида) ўқишга қабул қилиш учун ажратилади. 

Шунингдек, иқтидорли ҳамда ўзлаштириш кўрсаткичлари юқори бўлган талабаларга тўлов-контракт миқдорига нисбатан 50 фоизгача чегирма берилади.

Филиалда таълим бериш учун 70 фоизгача малакали хорижий профессор-ўқитувчилар Польша Республикаси ва Европанинг бошқа давлатларидан жалб қилинади.